Die Maturareise nach Prag

Teil I - Die Reise

Fir olle, de`s nou nit wissen: Prag isch a groaße Stodt...soll hot a insere Klasse be der Maturareise feststellen gemiet; sou an Haufen Kirchen, Museen, Kafka-Haiser etc. gibs nit oft af uan Fleck. Ober ollm schien uans nochen odern...

Gstartet sein mir in Sunntig (25.04.2004) umma 17.40 Uhr afn Bohnhof Meran, mitn Zug Richtung Bozen. Ob Bozen ischs men nor mit an schien, relativ nuien Zug (sicher kuan italienischer!) Richtung München gerattert. In München hatten mir an Schlofwogen reserviert gkob, wos jo eigentlich bruatl gschickt war. Ober olle hoben holt nit beiinonder schlofen gekennt. Sou isches holt derzua kemmen, daß mer zem schlofen gemiet hoben, wou holt nou Plotz wor...jemand isch pa die Learer unterkemmen, und mie hot men in a Obteil mit 3 junge chinesische Madler gsteckt. Uane fe de 3 wor sogor ziemlich nett; sie hot Keico (oder a onder gschrieben) gkoaßen, und wor 16 Johre olt. Noch obwechselnden Blickkontakt hob i nor eigentlich lei mear pennen gewellt, ober af uanmoll geat neben mir `s Liecht on, und die Keico frog: "Do you want to read my diary?" Der Faulheit noch logisch sauber kuan Nerv mear derzua, ober freundlichkeitsholber sog men holt "Yes". Noch der "Nocht-Lektüre" endlich schlofen...war sell fein gewesen, ober na, sell war nie meglich gewesen. Kaum ingschlofen, steat um holbe 4 in der Frieh af uanmoll a Typ vor mir und frog "Passport please". Noch ar Weil verstea i sogor wos de Gstolt fe mein Leben will, und i gib ihm mein superschienen Ausweis. Nochdem er 3 Minuten wie a Tepp af mein Foto gschaug hot, scheint olls zu passen. Endlich torf i wieder schlofen (10 Minuten long, nor sein nou die Deitschen kemmen mein Ausweisfoto onschaugen). Im ondern Obteil geat derweil holbegs die Post ob; os werd heftig diskutiert, wer seine Koffer wie pockt, und wos olls innenkimmp (die Learer im Nebenobteil hearen sauber olls mit, (ober sell wissen die uan jo [nou] nit). Um holbe 7 woche i (geroschtet) auf, (meine chinesische "Freindin" lig nou zen an Knuidel afn Bett) und gea afn Gong aussen. Noch ar Weil hon i die Augen offen, und af uan Schlog steat der Candy vor mir...nojo, wenn der Tog sou onfong, nor konner eigentlich niemer sou letz enden...

Umma 8te stien mer afn Prager Bohnhof und worten afn Bus, der ins zum "Hotel" bring. Um 20 noch 8te stien mier afn Bohnhof, und worten olleweil nou af den schebigen Bus. Endlich kimmp nor´irgendwenn der Kluanbus (ober a Merz), der ins zum Hotel bring. Noch 10 Minuten aufregender Busfohrt durch die Prager City, stien mir vorn Hote "ABE", des direkt neben ar Tiefgarage und an Computergschäft ("notebooky") steat. Ber Zimmervertoalung hon i a Moll Schwein (echt iets), und i bin in uanzigen 5-Bett-Zimmer, mitn Patsch, MeiCl, Zwinger und Lippi. Kaum im Zimmer, die erschte sorpresa: Des Zimmer isch holbegs groaß, und a guat ingerichtet (bis afn Kloschlüssel). Mir sein ins einig, dass mens do ausholten konnm und freidn ins afn insern 1sten Obend in Prag. --> Teil II